Mukabot na sa 78 ka mga tawo ang patay sa natigayong pagbaha sa pipila ka parte sa central Texas.
Gikumpirma ni Kerrville County Sheriff Larry Leitha nga miabot sa 59 ka mga tawo apil na ang 21 ka kabatan-unan ang napatay sa maong county, samtang lain pa ang natala sa kinatibuk-ang estado.
Samtang wala pa gihapon makaplagan ang 11 ka mga Camp Mystic campers ug usa ka councilor rason sa nagpadayong lapad nga search and rescue operation.
Nasayran nga nakapadala pa og warning ang mga otoridad alang sa posibleng pagsaka sa water level sa Guadalupe River, apan wala ray usa ka oras, miigo gilayon ang dakong baha nga mibanlas sa mga naagi-an niining mobile homes, mga sakyanan ug mga holiday cabins nga maoy gisak-an sa mga tawo alang sa ilang July 4 weekend holiday.
Padayong gipangita sa mga rescue crews ang hangtud sa 11 ka mga bata nga apil sa 750 ka mga batang babaye nga mitambong sa Camp Mystic sa San Antonio.
Gideklara gilayon ang state of emergency sa pipila ka mga counties kon diin ubay-ubay nga mga dalan ang nabanlas ug naputol usab ang linya sa komunikasyon.
