Posibleng musulod pag-usab sa Philippine Area of Responsibility (PAR) karong gabii o sa buntag sa Lunes ang tropical cyclone nga si Danas ( nga unang gitawag nga si Bising).
Sumala sa Philippine Atmospheric, Geophysical and Astronomical Services Administration (PAGASA) ulahing nakit-an ang sentro sa bagyo sa gibanabanang 385 kilometro sa kasadpang-habagatang bahin sa Itbayat, Batanes.
Gidala niini ang kusog nga hangin nga moabot sa 120 kilometro matag oras ug may pag-uyog nga moabot sa 150 kilometro matag oras.
Naglihok kini padulong sa amihanang-kasadpan sa tulin nga 10 kilometro matag oras.
Tungod sa epekto sa bagyo, gibutang sa PAGASA ang gale warning sa pipila ka baybayon sa Amihanang Luzon, lakip na ang Batanes, Babuyan Islands, ug Ilocos Region.
Gipasidan-an ang mga mangingisda ug gagmayng sakayan sa dagat nga dili una managat tungod sa posibleng pagsaka sa balud nga muabot sa 4.5 metros ang kataas.
Samtang, base sa datos sa Office of Civil Defense (OCD), mukabat na sa 13,006 ka mga indibidwal ang apektado sa bagyo sa mga rehiyon sa Ilocos, Cordillera Administrative Region (CAR), ug Cagayan Valley.
Wala pa masayri nga dunay namatay, apan padayon ang gihimong clearing operations sa mga kalsada nga dili malabyan tungod sa nahagsang mga kahoy ug debris.
Padayon nga nagbantay ang mga otoridad sa kalamboan sa maong bagyo ug gipahimangnuan ang katawhan nga mag-amping ug sundon ang mga advisories gikan sa mga lokal nga disaster risk reduction units.
