Napugngan sa mga Ukrainian nga otoridad ang pagsulay nga pagpatay kang Ukrainian President Volodymyr Zelensky.
Matod ni Vasyl Malyuk, ang pinuno sa Security Service of Ukraine (SBU), nahitabo ang maong pagsulay sa kinabuhi sa ilang presidente samtang anaa kini sa Rzeszów airport sa Poland.
Ang suspetsado usa ka Polish citizen ug kanhi sundalo nga gi-recruit na pila na ka tuig ang milabay.
Apil sa iyang mga plano ang paggamit og FPV drones ug mga ‘sniper weapons’.
Nagpasalamat si Zelensky sa SBU ug sa Polish Internal Security Agency tungod sa dali nga pagdakop sa suspetsado.
Dili kini ang unang higayon nga gisulayan og papatay si Zelensky, tungod sa milabay nga tuig, adunay mga sundalo usab sa Poland nga nisulay sa iyang kinabuhi.
Kadaghanan sa mga naaresto adunay trabaho o koneksyon sa Russian FSB.
Anaa karon sa United Kingdom si President Zelensky aron makigkita kang King Charles III.
