GENERAL SANTOS CITY – Mas gipakusgan pa sa General Santos City Police Office (GSCPO) ang ilang kampanya sa paspas nga pagresponde sa tanang matang sa emergency pinaagi sa pagtutok sa tulo hangtud lima minutos nga response time.
Tumong niini aron nga mas episyente ug mas paspas nga serbisyo sa publiko.
Gitutukan sa kapulisan ang pagpakusog sa presensya sa mga patrol cars ug foot patrols sa matag area aron andam sa tanang oras.
Matud ni City PNP Director PCol. Nicomedes Olaivar Jr., ang gipahimutang ang mga police visibility points sa mga critical nga lugar sa syudad.
Ang mga mobile patrols gibutangan og mas klarong deployment schedules aron dali silang makatubag sa mga tawag, ilabi na sa mga insidente sama sa krimen, aksidente, kagubot sa komunidad ug uban pa.
Gipalig-on usab ang koordinasyon sa mga barangay tanod, traffic personnel ug CCTV monitoring centers sa syudad aron mapadali ang pag-alerto sa kapulisan ug maapil dayon sa aksyon ang mga mobile response teams.
Gamit usab ang mga radyo ug digital communication system sa pagbalhin sa impormasyon gikan sa command center ngadto sa mga responder.
Giklaro sa GSCPO nga samtang dili pa tanan nga lugar sa dakbayan naabot ang maong target nga response time, daghan na sa mga urban barangays ang nakab-ot na ang lima ka minutos nga pag-abot sa kapulisan human sa pagtawag sa insidente.
Padayon ang ilang paningkamot nga mas mapaabot kini sa tanang barangay ning dakbayan sa Heneral Santos
