Gikonsidera sa gobyerno sa Pilipinas ang posibilidad nga ipataas ang alert level sa Israel ug Iran tungod sa padayon nga pagbinayloay sa mga opensiba sa duha ka nasud.
Matud pa ni Foreign Affairs Undersecretary Eduardo de Vega, bisan og ang Israel anaa pa sa Alert Level 2 ug ang Iran anaa sa Level 1, ang gobyerno gikatahong naglihok nga daw anaa na sa Alert Level 3 o ang yugto sa boluntaryong pagpauli sa mga Pilipino.
Sa usa ka pamahayag, gibutyag ni De Vega nga padayon ang ilang pagmonitor sa sitwasyon sa mga Filipino sa mga apektadong lugar aron masiguro ang ilang kaluwasan sa dili pa mopagawas og pinal nga desisyon.
Kahinumdoman nga bag-o lang nagpahigayon og air strike ang Israel sa pipila ka bahin sa Iran nga giingong preemptive strike aron mapugngan kini sa paghimo og nuclear weapon, apan mibalos ang Iran pinaagi sa paglusad og gatusan ka missile ug drone sa Israel.
Matod sa Department of Foreign Affairs (DFA), 26 ka mga Filipino ang gipaabot nga ibakwit gikan sa Israel paingon sa Jordan karong umaabot nga weekend, samtang laing 150 ang nipadayag sa ilang kaandam nga mobiya.
Aduna usab 17 ka mga Pinoy nga gustong mobakwit gikan sa Iran.
Kasamtangang gisuspinde ang mga flight operation sa lugar tungod sa nagkagrabeng tensyon.
