Nagpabiling way klaro ang status ni Indiana Pacers star Tyrese Haliburton kon makaduwa ba siya sa Game 6 batok sa Oklahoma City Thunder karong Biyernes, Hunyo 20.
Ang Pacers unang mitaho nga ang all-around guard nakahiagom og strain sa iyang tuo nga batiis tunga-tunga sa Game 5 ug ipaubos sa MRI aron matino ang kagrabe sa injury.
Pagbalik sa Game 5, si Haliburton kalit nga mibati og kasakit sa iyang batiis samtang nagdagan sa paint area nga walay kontak sa iyang mga kaubang player.
Mipaingon dayon siya sa locker room apan kadugayan mibalik sa 2nd quarter.
Pipila ka minuto ang milabay, ang Indiana star mibalik sa locker room apan pagkahuman hingpit nga mibalik.
Bisan og nakaduwa siya hangtod sa 4th quarter, tataw ang hinay niyang paglihok ug limitado lang sa 4 puntos, 7 ka rebounds, ug unom ka assists sa Game 5 ang nahimo.
Hangtod karon, wala pa gikompirma sa Pacers ang kasamtangang kahimtang sa injury ni Haliburton.
Apan, sa interbyu sa 1-time All-Star human sa duwa, iyang giinsister nga kon makalakaw siya, pilion niya nga moduwa sa Game 6.
Ang serye tali sa Thunder ug Pacers kasamtangang 3-2 human sa duha ka sunodsunod nga kadaugan sa Thunder, sa Game 4 og Game 5.
Ang Game 6 ipahigayon sa home court sa Pacers.
