Wala pay nadawat ang Philippine Embassy sa Tehran, Iran og bisan unsang pormal nga request alang sa repatriation gikan sa mga Pilipinong nanarbaho o nagpuyo didto, sumala sa Department of Foreign Affairs (DFA).
Kini ang klarong pahayag sa DFA taliwala sa padayon nga tensiyon sa rehiyon, ilabina ang kahimtang tali sa Iran ug Israel nga nagbilin og kahadlok sa posibleng eskalasyon sa armadong panagbangi.
Bisan pa man niini, gikatakda nga pasakyon pabalik sa Pilipinas ang 15 ka mga overseas Filipino workers (OFWs) gikan sa Israel human silang mopahayag nga gusto na nilang mopauli tungod sa kahadlok ug kahimtang sa seguridad.
Gipanghimakak usab sa DFA nga may “forced repatriation” karon, ug giila nga boluntaryo ang desisyon sa mga gustong mopauli.
Padayon ang koordinasyon tali sa Department of Migrant Workers (DMW), Overseas Workers Welfare Administration (OWWA), ug Philippine embassies aron masiguro ang kaluwasan sa tanang Pilipino nga apektado sa kasamtangang tensiyon sa Middle East.
Gipahimangnoan usab sa DFA ang tanang kababayan sa nasod nga magmatngon, magpabilin ang komunikasyon sa embahada, ug sundon ang mga advisory sa lokal nga otoridad ug Philippine posts.
