Gilugwayan sa Taiwan ang visa-free entry alang sa mga Filipino hangtod Hulyo 31, 2026.
Kini ang gipahibawo ni Taiwanese Foreign Affairs Minister Lin Chia-Lung alang sa extension sa visa-free entry sa mga Philippine passport holder atol sa gipahigayong panagtapok kalabot sa pagsaulog sa ika-127 nga anibersaryo sa Philippine Independence Day nga gipangunahan ni MECO Chairperson Cheloy Velicaria-Garafil.
Matod ni Minister Lin, ang maong lakang usa ka pakighiusa sa prinsipyo sa “reciprocity” o patas nga pagtagad sa mga lungsoranon sa duha ka nasod. Dugang pa niya nga nanghinaot sila nga moabot ang panahon nga makabiyahe usab ang mga Taiwanese sa Pilipinas nga walay visa.
Unang nalakip ang Pilipinas sa pilot visa-free scheme sa Taiwan niadtong Nobyembre 2017, nga nagtugot sa mga Filipino nga magpabilin sa Taiwan hangtod sa 14 ka adlaw nga walay visa.
