SARANGANI PROVINCE– Magpamilya ang sakay sa kotse nga napasok sa trailer truck sa Sitio Molave, Brgy. Talus, Malungon Sarangani Province kaganihang alas-singko sa buntag.
Nailhan ang mga pangalan sa biktima nga silang Abdulmajid Sarapudin, hamtong ang pangidaron, trabahante sa usa ka security agency sa Davao, kanhing miyembro sa Special Action Force, ang asawa niya nga si Ivy Lou Sarapudin, hamtong ang pangidaron, nagtrabaho sa usa ka agency sa Davao ug ang ilahang 3 years old nga anak mao si Coleen Sarapudin- nga residente sa Purok 7, barangay Apopong , General Santos City.
Nasayran nga padulong sila sa Davao, samtang ang truck ang padulong sa Gensan.
Sa wala pa ang pagkabangga sa kotse sa trailer truck, nahagbong ang usa ka ligid sa kotse sa aspalto, ug didto na nagtuyok-tuyok ang sakyanan hangtod nga nabangga sa kasugat nga truck.
Gumikan sa kakusog sa impact sa pagkabangga, napasok ang kotse sa truck nga hinungdan nga ‘on the spot’ nga patay ang magpamilya.
Sa karon anaa sa Malungon MPS ang driver sa truck nga boluntaryo usab nga nitahan human sa insidente.
