Dili mapungan ang ilegal nga pagnegosyo sa mga produkto sa vape pinaagi sa pagpaubos sa buhis.
Atol sa pagdungog sa Senate Committee on Ways and Means, gisugyot ni Senador Sherwin Gatchalian ang pagpalig-on sa pagpatuman sa balaod aron masumpo ang ilegal nga pagpamaligya sa vape products.
Partikular nga gitumbok sa senador ang pagpalambo sa mga bag-ong mekanismo sama sa paghatag og insentibo sa mga enforcement agencies.
Gitataw niini nga sa miaging tulo ka hearing, dili solusyon ang pagpaubos sa buhis sa mga vapor products aron masumpo ang ginadili nga patigayon sa maong produkto.
Ning puntoha, nasagmuyo si Gatchalian sa hinay nga pag-uswag sa mga kaso sa nasud nga may kalabotan sa illegal nga patigayon.
Base sa datos nga gipresentar sa hearing, gikan sa 2018 hangtod 2025, ang Bureau of Customs nagpahigayon og 1,296 ka mga seizure.
Niini nga gidaghanon, 64 lang ka kaso ang napasaka; 14 ang pending sa prosecutor’s office; walo ang gipasaka sa korte; ug duha ra ang adunay desisyon gikan sa korte.
Samtang, ang Bureau of Internal Revenue mihimo og 1,636 ka mga seizure gikan sa 2023 ngadto sa 2025.
Niini nga gidaghanon, 194 ka mga kaso ang napasaka; 15 ang pending sa prosecutor’s office; 14 ang gipasaka sa korte; ug usa ra ang adunay desisyon gikan sa korte.
Sa laing bahin, wala pa mosang-at og balaudnon ang Senado kalabot sa buhis sa mga produkto sa vape tungod kay nag-recess pa ang Kongreso.
