Nag-atubang na karon sa kasong serious illegal detention ang hepe sa Criminal Investigation and Detention Group (CIDG) Nicolas Torre III ug laing siyam ka mga opisyal sa CIDG.Sumala sa mga taho sa lokal nga media, naggumikan kini sa giingong ilegal nga pagdakop ug pagtanggong sa negosyanteng si Rotchelle Calle, 48, nga giingong nigamit og “photocopy” sa red notice nga giingong gikan sa International Police Organization (Interpol).
Ang maong red notice batok kang Calle—gi-issue sa Interpol niadtong Mayo 2, 2023—tungod sa kasong “fraud” nga gipasaka batok kaniya sa iyang kanhi business partner nga nakabase sa United Arab Emirates (UAE).
Niadtong Marso lang, gipasakaan na ni Calle og kaso si Torre ug ubang personahe sa CIDG tungod sa giingong ilegal nga pagdakop ug pagdetine kaniya sulod sa unom ka adlaw.
Sa reklamo sa negosyante nagkanayon nga ang mga personahe sa CIDG miadto sa iyang panimalay niadtong Nobyembre 19, 2024 aron i-serve ang red notice. Apan matod niya, giingnan siya sa mga personahe sa CIDG nga dili siya dad-on sa Bureau of Immigration (BI) kon hatagan siya og “Christmas present.
Giingong nibalibad si Calle ug paglabay sa duha ka adlaw, niadtong Nobiyembre 21, nibalik na usab kuno ang mga personahe sa CIDG ug gidakop siya sa Makati City Hall.
Sa samang adlaw, gikataho nga gitanggong siya hangtod sa Nobyembre 27, 2024.
Niadtong Nobyembre 26, 2024, gihangyo sa Public Attorney’s Office (PAO) si Torre nga buhian si Calle tungod kay wala sila nagsilbi nga warrant of arrest sa naulahi.
Dugang pa ni Calle nga sa wala pa siya gibuhian, gipapirma siya sa usa ka pamahayag nga nagpahayag nga siya boluntaryong mitahan sa kapulisan.
Sa laing bahin, giingong gihimo ang preliminary investigation sa Makati niadtong Abril 21 ug Abril 28, 2025, apan si Torre ug iyang mga tawo wala motunga.
Ang Makati Prosecutors Office niisyu og subpoena ngadto sa hepe sa CIDG ug sa iyang nalambigit nga mga personnel.
Depensa ni Torre nga wa makaabot kanila ang subpoena hinungdan nga wala sila motunga. Matod niya sa social media ra niya nakita ang subpoena.
Dugang pa sa CIDG nga nasurprisa kini dihang nasuta ang maong isyu.
Gitambagan pa niya si Calle nga pasakaan usab og kaso ang iyang kauban, nga giingong gihimo ni Calle niadtong Nobyembre 27
Dugang pa ni Torre nga mibalik kanila si Calle niadtong Enero dala ang warrant of arrest batok sa iyang kauban ug giingong nihangyo nga ipadakop siya sa Batangas. Nasakpan kuno nila ang kauban ni Calle.
Sa pagkakaron, wala pa kuno makasabot si Torre nganong gipasakaan siya og kasong illegal detention.
