Napulo ka mga sakop sa Criminal Investigation and Detection Group (CIDG) ang anaa karon sa Philippine National Police (PNP) Custodial Facility tungod sa giingong pagpanulis, pagpangilkil ug kidnapping kalabot sa pagpangronda sa Tondo, Manila.
Matod sa CIDG niadtong Huwebes, gironda sa kapolisan ang usa ka bodega tungod sa giingong kalapasan sa balaod sa armas niadtong Pebrero 17 ug gidala ang mga dinakpan sa buhatan sa CIDG-Southern District Field Unit sa Taguig.
Ang tulo ka mga indibidwal mireklamo nga ang kapulisan giingong nangayo og P18 milyones bugti sa ilang kagawasan.
Human sa paghatag og kuwarta, ang mga dinakpan giingong gidala sa laing lugar diin gitionan sila og armas.
Nangayo og dugang kuwarta ang mga polis apan wala kini gihatag. Ang mga dinakpan gibuhian pagkasunod adlaw.
Ang CIDG niingon nga ang mga pulis nga nalambigit kay gikan sa Patrolman hangtod sa Lieutenant Colonel.
Gikatahong gitangtang dayon sila sa ilang puwesto ni CIDG chief Police Major General Nicolas Torre III, gitanggong sa PNP Custodial Facility, ug gipaubos sa imbestigasyon.
Ang mga reklamo nga giatubang sa 10 ka mga pulis naglakip sa grave misconduct, kidnapping, illegal detention, unlawful arrest, ug planting of evidence.
