GENERAL SANTOS CITY- Dead-on-the spot ang usa ka babaye human malambigit sa road accident sa may Makar-Siguel Road, atubangan sa usa ka meat shop sa Barangay Calumpang General Santos City.
Giila ang biktima nga si Grace Seiz-Ong, anaa sa hamtong ang pangidaron, ug residente sa Ozamis Occidental.
Sa imbestigasyon nga gipahigayon sa taga Traffic Enforcement Unit nasuta nga ang biktima gikan sa usa ka meat shop sa maong lugar ug sa dihang mutabok na unta kini sa dalan kalit kining nabanggaan sa traysikol nga adunay plate no. nga 120105 nga gimanehuan ni Ronnie Torres Austero, hamtong, minyo ug residente sa Prk. Santa Cruz, Sampaguita Street, Brgy. Calumpang, Gensan.
Natigayon ang insidente sa udto, Nobyembre 27 2024.
Nasayran nga ang driver sa traysikol ang mibyahe gikan sa Gensan Fishport padulong sa Calumpang proper gamit ang outer lane.
Gidala pa sa balay tambalanan ang biktima apan gideklara kining dead-on-arrival. Ang driver kustodiya karon sa TEU.
