Gituboy nga bag-ong chief sa Bureau of Immigration si kanhi Immigration Deputy Commissioner Joel Viado.
Gihulipan ni Viado ang natangtang nga si kanhi Immigration chief Norman Tansingco sa miaging bulan sa Setyembre human sa kontrobersiya sa pagsibat ni dismissed Bamban, Tarlac Mayor Alice Guo sa Pilipinas bisan pa sa Immigration lookout bulletin batok kaniya.
Sa usa ka statement, misaad si Viado nga magpatuman og mga reporma sa ahensya.
Lakip niini ang pagsumpo sa korupsiyon sa Immigration bureau og ipadayon usab ang pakig-alayon sa Department of Justice alang sa pagpalambo pa sa ahensiya.
Magpahigayon usab ang iyang opisina og pagtuon sa kasamtangang mga polisiya og procedures sa BI aron matumbok ang mga dili episyente og matangtang ang redundancies sa ahensiya.
Isip usa usab ka abogado, suportado usab niya ang pagpasa og bag-ong immigration law aron mailisdan na ang 84 ka tuig nga Philippine Immigration law nga matod pa dili haum sa bag-ong panahon og babag sa mga ginahimong modernisasyon sa bureau.
Kung makaangkon matod pa og bag-ong balaud, mas mapapaspas na ang mga proseso sa Immigration og mapakusog pa ang seguridad sa mga border sa Pilipinas.
