Gituboy ni Pangulong Ferdinand Marcos Jr. si kanhi Executive Secretary Oscar Orbos isip acting chairperson og miyembro sa Board of Directors (BOD) sa People’s Television Network, Inc. (PTNI) isip representante sa pribadong sektor.
Si Orbos ang nahimong Executive Secretary og kalihim sa Department of Transportation and Communications (DOTC) ilawom sa administrasyon ni kanhi Pangulong Corazon Aquino gikan 1990 hangtod 1991.
Nasayran nga si Orbos nagsilbi usab isip kongresista sa unang distrito sa Pangasinan gikan 1987 hangtod 1990 og isip gobernador sa probinsya gikan 1995 hangtod 1998.
Samtang, gituboy usab ni PBBM si political analyst Antonio Contreras isip acting vice chairperson og miyembro sa BOD sa PTV isip representante sa educational sector.
Gituboy usab ni Pangulong Marcos silang kanhi PTV General Manager Katherine Chloe De Castro isip Director General sa Philippine Information Agency (PIA) og Atty. Francis Carlo Taparan isip Director IV sa National Printing Office (NPO). // Via Bombo Anne Soberano
