Gibombahan sa Israel ang sentrong distrito sa Beirut, Lebanon nga mipatay ug 6 ka tawo.
Gawas pa sa namatay, 7 ka mga tawo usab ang nasamdan sa pag-atake.
Sumala sa Israel, naghimo lamang sila og tukmang air strike sa kaulohan sa Lebanon ug gitarget ang usa ka gambalay sa distrito sa Bachora, Lebanon.
Kini ang labing duol sa sentro nga distrito sa Beirut nga naigo sa usa ka air strike sa Israel.
Tulo ka mga missile usab ang miigo sa habagatang Dahiyeh, nga nagsilbi nga kuta sa Hezbollah sa habagatang Beirut, diin napatay miaging semana ang lider sa Hezbollah nga si Hassan Nasrallah.
Sa pikas bahin, nagpasidaan ang militar sa Israel nga magpadayon ang ilang mga air strike sa habagatang bahin usab sa Lebanon.
Kahinumduman nga gisugdan sa Israel ang ground invasion sa habagatang Lebanon karong semanaha ug gikumpirma nga sa labing bag-ong pag atake, 8 sa ilang mga sundalo ang napatay sulod sa Lebanon.
