Gitataw sa Commission on Elections nga dili nila i-disqualify ang usa ka indibiduwal isip nuisance candidate tungod lang sa kabus.
Matod ni Commission on Elections (Comelec) Chairman George Garcia, walay property qualification nga makahupot og public office.
Hinuon giangkon ni Garcia nga posibleng makatampo pa kini sa ilang desisyon, apan dili kini magdeterminar sa ilang desisyon.
Ang opisyal nihimo sa maong pamahayag human pipila ka mga senatorial aspirants ang nipadayag sa ilang kasagmuyo sa unang adlaw sa pag-file sa COC karong Martes tungod kay gideklarar sila nga nuisance candidates sa miaging piniliay.
Giangkon sa hepe sa poll body nga daghang reklamo ang giatubang sa Comelec ngadto sa Korte Suprema gikan sa mga kandidato nga nireklamo nga giklasipikar sila nga disturbance o nuisance.
Gipasabot ni Garcia nga base sa hukom sa korte kaniadto, naghatag kini og giya sa Comelec kon unsaon nila pag-proseso ang mga mo-file sa kandidatura karong tuiga.
Matod niya, ang mga kandidato nga gi-tag nga nuisance ipatawag ug hatagan og kahigayonan nga makapasabot nganong dili sila nuisance candidates.
