Mas dako gihapon ang budget ni Bise Presidente Sara Duterte alang sa Office of the Vice President para sa fiscal year 2025 kaysa sa iyang gisundan nga si Leni Robredo sa iyang unom ka tuig nga termino.
Matod ni Senior Deputy Speaker ug Pampanga’s 3rd District Representative Aurelio “Dong” Gonzales Jr., dili mahugno ang OVP ubos sa pamunoan ni VP Sara bisan pa man sa pagkaputol sa pundo niini alang sa sunod tuig.
Si Gonzales niingon nga igo pa ang pundo sa OVP sa pagtuman sa mga katungdanan niini sa konstitusyon.
Mismo si Speaker Martin Romualdez nihangyo nga dili mahurot ang pundo sa OVP bisan pa man nga wa motambong si VP Sara sa budget deliberations sa iyang buhatan sa Kamara.
Matod ni Gonzales, kon itandi sa unang tuig ni VP Sara niadtong 2023, ang OVP fund anaa sa P2.344 bilyon diin P500 milyones ang confidential fund ug P920 milyones ang financial assistance allocation.
Samtang sa panahon ni Robredo, P428.6 milyones ang iyang pundo ug walay confidential ug intelligence fund ug walay pundo alang sa financial assistance.
Niadtong 2016, ang OVP adunay P500 milyones nga gipaambit nila ni kanhi bise presidente Robredo ug Jejomar Binay.
Matod ni Gonzales, tataw nga nakatagamtam og dakong budget si VP Sara kon itandi ni VP Leni.
Matud ni Marikina Rep. Stella Luz Quimbo OVP ug ilang FA beneficiaries mahimo gihapon nga maka-access sa alokasyon pinaagi sa pagpadala sa ilang request ngadto sa DSWD ug DOH.
Giklaro ni Quimbo nga walay kuwarta nga gikuha gikan sa gahin sa OVP alang sa sweldo tungod kay gusto nila nga mapreserbar ang mga trabaho
