Bantayan sugod alas 10:00 sa buntag ang hiniusang pwersa sa tulo ka mga committee sa Senado sa atubangan sa 26 ka resource persons nga adunay ipahayag kalabotan sa makauulaw nga pagpalayo ni dismissed Bamban, Tarlac Mayor Alice Guo og iyang mga kaubanan paadto sa gawas sa nasod.
Manguna sa hearing ang Senate committee on justice and human rights nga ang chairperson mao si Minority Leader Aquilino Pimentel Ill, samtang secondary og tertiary committees usab ang Senate committee on women, children, family relations, and gender equality ni Deputy Minority Leader Risa Hontiveros og Senate committee on public services ni Senator Raffy Tulfo.
Usa sa resource persons mao ang igsuon ni Guo nga si Sheila Leal Guo nga gi-turnover na sa Senado kagahapon sa National Bureau of Investigation (NBI) human gipasakaan og kaso tungod sa obstruction of justice og illegal use of passport og uban pa nga criminal charges.
Ang business partner usab ni Guo nga si Cassandra Li Ong ang gidala usab sa NBI sa House of Representatives.
Si Sheila og si Ong ang pareho nga nadakpan sa Batam Island sa Indonesia kaniadtong Agusto 20.
Lakip sa ginalauman nga istoryahan mao ang proposal sa Department of Foreign Affairs nga kanselahon ang Philippine passport ni Alice Guo ukon ang Chinese national nga si Guo Hua Ping.
Lakip usab sa imbitado mao silang Justice Secretary Jesus Crispin Remulla, Foreign Secretary Enrique Manalo, Interior Secretary Benhur Abalos, Information and Communications Technology Secretary Ivan John Uy og Transportation Secretary Jaime Bautista.
Anaa usab ang mga representante sa NBI, Philippine Amusement and Gaming Corp. (PAGCOR), Securities and Exchange Commission, Civil Aviation Authority of the Philippines, Philippine Statistics Authority, og Presidential Anti-Organized Crime Commission.
Bantayan usab kung motambong ang abogado nga si Elmer Galicia nga mao ang nag-notaryo sa counter-affidavit ni Guo karong bulana bisan nakumpirma sa otoridad nga nakalayas na kini sa Pilipinas sa bulan pa lamang sa Hulyo.
