Misurender sa mga awtoridad sa Estados Unidos ang founder sa Smartmatic nga si Roger Piñate aron atubangon ang kasong bribery ug money laundering.
Base sa taho, si Piñate ni-surender sa Miami federal court, uban ni kanhi Smartmatic vice president for hardware development Jorge Miguel Vasquez.
Sila si Piñate ug Vasquez nalakip sa upat ka mga tawo nga nauna nang gipasakaan og kaso sa federal grand jury sa miaging semana tungod sa giingong paglambigit sa bribery ug money laundering operations nga may kalabotan sa 2016 elections sa Pilipinas.
Base sa taho sa US, nakagawas dayon si Piñate human kini makapiyansa nga mokabat sa $8.5 milyones o bugti sa P484 milyones, samtang si Vasquez nakagawas usab sa $1 milyones nga bond ukon halos 57 milyones.
Base sa nauna nang gipagawas nga report sa US Justice Department, si Piñate ug Vasquez parehong gipasakaan og kasong conspiracy to commit money laundering ug tulo ka ihap matag usa sa international laundering of monetary instruments.
Kauban nila si kanhi Commission on Elections Chair Andres Bautista ug Elie Moreno nga kanhi bise presidente sa Smartmatic global services unit. Matod sa US Justice Department, sila si Piñate ug Vasquez nagkasabot nga bayran og usa ka milyon ka dolyares si Bautista.
Ang maong pagbayad giingong aron mamintinar ang ilang ‘negosyo’ nga may kalabotan sa suplay sa mga makina sa pagboto ug uban pang serbisyo sa eleksyon alang sa 2016 Elections sa Pilipinas.
Samtang, kung ang upat mapamatud-an nga sad-an, ang matag usa mahimong mag-atubang sa labing taas nga silot nga 20 ka tuig nga pagkabilanggo alang sa mga kaso sa laundering.
