Nagdumili ang Commission on Audit (COA) nga ipagawas o ipahibalo sa publiko ang ilang audit findings o ang resulta sa ilang imbestigasyon kalabot sa kontrobersyal nga confidential funds sa Office of the Vice President ug Department of Education (DepEd) ubos sa liderato ni Bise Presidente Sara Duterte .
Nahimong sentro ang isyu sa confidential funds sa OVP ug DepEd dihang nangilabot ang COA sa budget deliberation sa House Committee on Appropriations alang sa ilang 2025 national budget.
Sa maong budget briefing, si COA Chairperson Gamaliel Cordova nipahibawo nga ang OVP ug DepEd nakasumite na sa ilang liquidations.
Gipasabot ni Cordova nga tungod sa confidential nga matang sa maong pundo, dili nila kini mapahibalo sa publiko.
Apan matod ni ACT Teachers Partylist Rep. France Castro, interesado ang publiko nga masayod giunsa paggasto sa OVP ug DepEd ang confidential funds.
Tungod sa pagdumili sa COA sa pagpagawas sa ilang audit findings, ang magbabalaod niduso og motion to release sa COA findings.
Kung mahinumduman, ang confidential funds sa OVP sa 2022 kay P125 milyones.
Niadtong 2023 ang GAA mihatag og P500 milyones nga confidential funds ngadto sa OVP samtang ang DepEd nakakuha og P150 milyones nga confidential funds.
Apan, gibalik-balik sa COA nga dili nila mapagawas ang mga detalye sa audit findings.
