Nakadawat pa og dugang P20 milyon gikan sa Office of the President si Pinoy 2-gold Olympic medalist gymnast Carlos Yulo.
Gihimo ang paghatag sa nasangpit nga cash incentives sa Palasyo Malacañang pila ka oras lang human nangabot sa nasod ang mga atletang Pinoy gikan sa Paris Olympics.
Sigon usab ni Pangulong Ferdinand Marcos Jr nga gitupngan lang niini ang insentibong nakalatid sa Republic Act 10699 kon ang National Athletes, Coaches, and Trainers Benefits and Incentives Act, kansa nagkanayon nga si kinsa mang atleta nga makakuha og bulawang medalya sa Olympics makadawat og P10 million, ug tungod duha man ka bulawang medalya ang nakuha ni Yulo, aduna na kini P20 million.
Gihatagan usab ni Pangulong Marcos si Yulo og Medal of Merit kansa ginahatag lang sa mga indibidwal nga nakahimo og kalampusan sa mga international events sa natad sa literature, sciences, arts, entertainment ingon man sports kansa mamahimong tawgon nga national pride.
Alayon niini, nakadawat usab og dugang P2-milyon ang mga bronze medalist nga mga Pinay boxers nga sila si Nesthy Petecio og Aira Villegas kansa gitupngan usab sa Presidente ang nakalatid nga P2-M sa balaod, buot ipasabot matag usa nilang Petecio og Villegas ang midawat ug P4 million.
Lakip ang mga wala makakuha og medalya gitunolan usab sa Presidente og incentives nga nagkantidad og P1-M, samtang tig-P500,000 usab alang sa mga coaches niini.
Ang pamahayag ni Presidente Marcos Jr. atol sa pagsugat niini sa mga atletang Pilipino nga gikan sa Paris, France.
