Miani na usab og managlahing reaksyon gikan sa mga netizen sa social media ang pag-abot sa mga atleta dinhi sa Pilipinas gikan sa Paris Olympics kagabie.
Ug ang hisgutanan, napunting na usab kang Golden Boy Caloy.
Apan ning higayona, wala na kini kalabotan sa iyang pagkadaog og duha ka medalya o kaha sa mga nadawat niining pasidungog, kun dili sa lovelife niini, ingon man sa iyahang pamilya.
Mamatikdan nga sa tanang mga atleta nga midawat sa ilang award kagabie gikan kang Presidente Marcos, ang Pinoy Hurdler lang nga si John Tolentino ug si Carlos Yulo ang walay kauban nga pamilya.
Apan bisan kon wala ang pamilya ni Yulo, kansa bag-ohay lang naghatag og kasaba sa social media, hinuon present ang girlfriend niini nga si Chloe San Jose.
Wala usab makalikay sa mga mata sa netizen ang pagsul-ob og jacket ni Chloe nga angayan unta mga Olympian lang magsuot niini dihang miabot na sila ni Yulo sa nasud.
Daghang mga netizens ang nagsugyot nga taliwala pa man sa pagpa-presscon sa inahan ni Yulo alang sa pagpangayo og kapasayloan, dili gihapon ‘okay’ ang ilahang pamilya.
Daghan usab nga mga netizens ang subo ang gibati tungod sa maong panghitabo, diin ang uban, daw wala malipay sa over exposure na matud pa sa uyab niini nga si Chloe.
Kahinumduman nga nagpa-interview ang inahan ni Yulo sa Bombo Radyo niadtong Agusto 4, diin giangkon sa inahan ni Caloy nga si Angelica Poquiz Yulo nga wala silay maayong relasyon sa anak niini.
