GENERAL SANTOS CITY – Kustudiya na sa mga personahe sa City Social Welfare Office ang usa ka batang lalaki nga gibilin atubang sa gate sa usa ka residente sa Purok Mapailubon, Barangay San Isidro ning syudad.
Kini human gibutyag sa nagpangalan ug Lilia Manio nga residente sa lugar nga pasado alas dose sa udto niadtong adlaw nga sabado nakita sa iyang apo ang usa ka eco bag atubang sa ilang tindahan nga adunay unod nga gituhu-an niini nga Iring.
Dihang giduolan ug gitan-aw ang bag didto nakita nga may unod nga batang lalaki.
Nakita matud pa nga giamigas na ang bata nga gituhu-an nga bag-ong gihimugso tungod aduna pa kini’y sumpay sa pusod.
Pagsaysay ni Manio nga nakaputos ug lampin ang bata nga gituhu-ang gipa breast feed pa sa inahan tungod may pat-ak sa gatas ang ngabil niini.
Nagduda pa ang mga residente nga gituyo pagbilin ang bata sa lugar tungod gipalandungan sa punu-an sa kapayas.
Nagpahigayon na ug pagsusi ang taga Barangay sa mihimo niini aron mailhan ang inahan nga mipakatawo ug nagbilin sa bata sa maong lugar.
