Gimando sa Police Regional Office 9 ang lalom nga imbestigasyon kabahin sa natigayon nga pagbuto kagahapon Lunes pasado alas 5 sa hapon sa Brgy Cabatangan, Zamboanga City.
Nasayran nga una ng nagpagawas ug abiso ang PRO 9 nga magpahigayon ug detonation sa mga nakumpiskang firecrackers ug pyrotechnics ang Philippine National Police Explosive Ordnance Disposal Team.
Mukabat sa 30 mga indibidwal ang nasamdan sa mipalpak nga disposal process nga nagresulta sa kusog nga pagbuto kung asa 19 niini mga uniform personnel ug 11 ang mga sibilyan.
Lakip sa mga nasamdan ang unom ka myembro sa PNP Regional Explosives and Canine Unit, 3 myembro sa Philippine Coast Guard, 5 ginsakpan sa Bureau of Fire Protection ug 5 ginsakpan sa Philippine Marines.
Base sa pinakaulahing taho sa CDRRMO nga duha ka pasyente ang anaa sa grabeng kahimtang.
Gawas niini, nakatala usab ug damyos sa 4 nga government vehicle, kabalayan ug buak buak nga salamin sa pipila ka pribadong establisiemento.
Sumala sa taho, gibasa matod pa ang mga pabuto una kini gipabuto apan sa wala damha nagresulta gihapon kini sa halapad nga kadaut.
Kahinumduman nga ang mga nasangpit nga mga pabuto ang mga nabilin nga firecrackers nga wala mibuto sa natigayong sunog niadtong June 29 sa Brgy Tetuan nga gikamatay sa lima ka tawo.
