Pormal nang nagpasang-at ug reklamong qualified trafficking in persons batok kang suspended controversial Bamban, Tarlac Mayor Alice Guo ug kanhi opisyal sa gobyerno nga si Dennis Cunanan.
Ang nasampit nga mga reklamo may kalabutan sa matod pa pagkalambigit niini sa ilegal nga operasyon sa Philippine Offshore Gaming Operators sa Bamban, Tarlac ug Porac, Pampanga.
Kini human makakita ug ebidensiya ang ahensiya sa kalambigitan ni Guo sa mga ilegal nga operasyon sa POGO sa iyang hurisdiksiyon.
Sumala sa PAOCC adunay nakita nga daghang mga dokumento nga adunay pangalan ug pirma ni Mayor Guo sa ilang imbestigasyon.
Ang PAOCC maoy responsable sa pag-raid sa POGO compound nga gitukod sa property nga kanhi panag-iya ni Guo.
Una na usab nga migawas sa gipahigayong raid sa PAOCC ug imbestigasyon sa Senado nga kanhi nakignegosyo si Mayor Guo sa Chinese firms nga nalambigit sa mga operasyon sa POGO sa Bamban nga padayon nga naga-operate bisan pa walay government permits.
