Gikumpirma sa Department of Foreign Affairs (DFA) nga adunay usa ka Pinay sa Riyadh, Saudi Arabia nga nalakip sa kapin 900 nga napatay sa hajj pilgrimage nga gipahigayon sa tunga sa hilabihan kainit nga panahon.
Heatstroke ang rason sa kamatayon sa maong Pinay sumala kang DFA Undersecretary Eduardo de Vega.
“So far, only one female Riyadh-based Filipino pilgrim died of natural causes (heatstroke) in Makkah,” kumpirmasyon ni de Vega.
Kini nga Filipina ang nalubong na sa nakalabay nga adlaw’ng Myerkules.
Base sa datos sa ahensya, mikabat sa 5,100 Filipino pilgrims karong tuiga duol sa numero nga gi-release sa National Commission on Muslim Filipinos (NCMF) nga adunay 5,060 Filipino Muslims nga nag-adto sa Saudi aron mutambong sa Hajj pilgrimage.
Nakapadala usab ang DFA ug team sa Saudi Arabia aron nga mutabang sa embahada sa Pilipinas sa pagmonitor ug paghatag ug assistance sa pilgrims karong tuiga.
Kahibaluan nga adunay mga missing pa sa pagkakaron dungan sa maong aktibidad.
Human kini sa na-rekord nga 51.8 degrees Celsius nga temperatura sa Mecca nga mao ang holiest city sa Islam sa Saudi Arabia sa nakalabay nga Lunes.
Ginabana nga anaa sa 1.8-million ka mga tawo gikan sa nagkalain-laing mga nasud ang nagpasakop sa inadlaw nga pilgrimage nga kalabanan gipahigayon sa gawas bisan pa pa nagalagiti ang init.
Adunay usa ka Arab diplomat nga nagkumpirma nga sa Egyptians pa lamang, mukabat na sa “at least 600” ang napatay nga mas taas sa 300 nga na-report sa milabay nga adlaw.
Lakip sa nareport nga missing mao ang wala narehistro ug walay official hajj permit rason nga wala naka-access sa air-conditioned facilities kun asa makapabugnaw unta ang pilgrims.
Sa karon gibaha ang Facebook ug uban pa nga social media networks sa mga hulagway sa mga missing ug sa mga hangyo nga magpagawas na ug dugang nga mga impormasyon.
Kahibaluan nga ang hajj ang usa sa lima ka pillars sa Islam ug ang ‘timing’ niini ang ginasubay sa Islamic lunar calendar.
Gawas sa nareport nga mga patay sa Egypt, nagkumpirma usab ang Jordan, Indonesia, Iran, Senegal, Tunisia ug autonomous Kurdistan region sa Iraq nga aduna usab pilgrims nga napatay gikan sa ilang mga nasod apan walay partikular nga rason nga gipagawas sa sapubliko.
Walay gihatag nga impormasyon ang Saudi Arabia kun pila ang napatay apan nareport niini nga adunay kapin 2,700 ka mga kaso sa “heat exhaustion” sa adlaw lamang sa Domingo.
Sa nakalabay nga tuig, sobra usab sa 200 ka pilgrims ang napatay nga kalabanan gikan sa Indonesia.
