GENERAL SANTOS CITY – Gitun-an sa kapulisan ang kuha sa CCTV camera aron mailhan ang upat ka mga lalaki nga nagsakay ug motor nga responsable sa pagpusil patay sa Korean national nga si Jong Jang Ko, 45 anyos nga residente sa Cannery, Polomolok, South Cotabato.
Matud ni Police Lt. Reden Cuevas, deputy Chief of Police sa Polomolok Municipal Police Station nga ilang gi-estudyuhan ang pag-ila sa mga suspek samtang padayon ang pagtigum ug ebidensya aron masulbad ang naasoy nga krimen.
Sa imbestigasyon nga sakay sa iyang Innova utility vehicle ang biktima dihang miagi sa Sanchez Street sa Poblacion Polomolok dihang gisundan sa duha ka motor nga may tag duha ka sakay nga lalaki.
Makit-an sa video nga ang motor nga mitapad sa wala nga bahin sa sakyanan ang mipusil sa biktima hinungdan nga naigo sa ulo ug lawas nga bahin.
Matud ni Lt. Cuevas nga gidala sa ospital ang biktima apan gideklara nga patay na.
