GENERAL SANTOS CITY – Nagpabilin sa custodial facility sa Makar Police Station ang duha ka mga personalidad nga nasikop gumikan sa paghupot og nagkadaiyang kalibre sa armas ug bala, atol sa gimuntar nga security checkpoint sa miaging mga adlaw.
Matud ni P/Col. Allan Ladra, regional chief sa Highway Patrol Group (HPG) 12, kasong “Unlawful possession of Firearms and Ammunition” ang nakatakdang ipasangat nga kaso batok kang P/SSG Abdul Gani Mapandi Macapadala, 36 anyos nga na-assign sa Esperanza Municipal Police Station sa Sultan Kudarat Provincial Police Office og residente sa Purok Masagana, Kalawag 2, Isulan Sultan Kudarat.
Ang laing dinakpan mao si kanhi P01 Warden Lagawan nga residente sa President Quirino, Sultan Kudarat.
Kahibaluan nga samtang nagpahigayon og security checkpoint ang tropa sa kapulisan sa bahin sa national highway sa Barangay Apopong, nadiskubrehan ang maong assorted short ug long firearms, sulod sa gisakyang Toyota Vios color puti nga may temporary plate A9 C408 .
Lakip niini ang usa ka unit sa 9mm glock pistol nga may magazine og 21 ka buhing bala.
Usa ka unit 9mm dessert eagle 9mm pistol nga adunay 15 ka buhing bala.
Laing usa ka unit sa caliber 45 compact cult defender nga may unom ka buhing bala.
Nakumpiska usab ang lima ka units sa M16 rifles, 44 ka buok sa long steel magazine sa caliber m16 rifle, lakip ang lima ka buok sa steel box nga ang matag kahon ang may 1,000 rounds sa buhing bala sa M16 rifle.
Napakyas makapakita og igong dokumento ang duha, hinungdan nga gilayon silang giaresto.
