Misaka na sa upat ang gidaghanon sa mga Pilipinong nasamdan sa pag-atake sa King Khalid International Airport sa Riyadh, Saudi Arabia, niadtong Sabado, Oktubre 10.
Sumala sa Department of Migrant Workers (DMW) niadtong Domingo, tulo sa mga nasamdan ang anaa sa intensive care unit o ICU, samtang ang usa gilauman nang makagawas sa ospital. Wala usab gikataho nga Pilipino ang namatay sa maong pag-atake.
Sa kinatibuk-an, 12 ka tawo ang namatay ug 309 ang nasamdan sa pag-atake nga gipasanginlan sa Houthi sa maong tugpahanan.
Matud ni Labor Attaché Dominador Salanga sa Migrant Workers Office sa Riyadh, padayon ang pagtabang sa Overseas Workers Welfare Administration o OWWA ug sa ilang opisina sa mga Pilipinong nasamdan samtang nagpaayo sa nagkadaiyang ospital.
Nakig-alayon usab ang ilang opisina sa lokal nga mga awtoridad ug ospital aron mapamatud-an kung adunay dugang nga mga Pilipinong naapektuhan sa pag-atake.
Gipahimangnoan sa DMW ang mga overseas Filipino worker o OFW sa Saudi Arabia nga likayan ang mga lugar nga posibleng target sa pag-atake ug sundon ang mga pahibalo sa embahada, konsulado ug mga opisina sa MWO. Gitambagan usab ang mga adunay iskedyul sa pagpauli sa Pilipinas nga mokontak una sa ilang airline ug susihon ang ilang email alang sa mga update sa ilang biyahe.
