GENERAL SANTOS CITY- Gimando na sa liderato sa General Santos City Police Office nga ipailawom sa restrictive custody ang on-duty personnel sa Tambler Police Station , atol sa pagkamatay sa usa ka detainee.
Gikumpirma ni Station commander, Police Major Ananias Vasquez ang maong katikaran samtang nagpadayon pa ang ginahimong imbestigasyon.
Una nang gikataho nga gitabangan matod pa sa pagkulata sulod sa selda, sa upat ka mga piniriso ang biktima nga si Philip Tacdoro Nocete, kansa nadakpan niadtung miaging adlaw sa kasong attempted rape.
Giila usab sa opisyal ang mga suspeks nga silang Jeffrey Khong Atche, Richard Kevin Delfino Beraque, Charles Chavez Cañeda ug Gary Boy Delnorte Gong.
Samtang, hustisya usab ang singgit sa pamilya ni Nocete ug andam silang magpasaka og kaso sa mga responsable sa kamatayon niini.
