GENERAL SANTOS CITY – Laing sakop sa Dawlah Islamiyah ang patay sa gipahigayong buybust operation sa Purok 1, Brgy. Koronadal Proper, Polomolok, South Cotabato.
Matud pa kang P/ Capt. Randy Apostol, ang deputy chief sa Polomolok PNP ang namatay nga si Jafar Ewa, 25 anyos nga residente sa Prk. 4b, Brgy. Koronadal Proper sa maong munisipyo.
Nasayran nga human matunol ang buybust item namamtikdan sa suspek nga pulis ang iyang ka-transaksyon hinungdan mibunot og pusil ug gipabuthan ang operatiba, apan naunhan kini hinungdan nga nakaangkon og mga samad pinusilan sa iyang lawas.
Gidala pa sa ospital ang nasampit apan gideklarang dead on arrival sa doktor.
Matud pa kang Apostol nga nakuha gikan sa suspek ang lima ka sachet sa shabu og improvised nga pusil.
Gitudlo usab si Ewa nga suspek pagpamusil sa usa ka Ulysis Pitalgo kaniadtong Enero 5 sa may Brgy. Koronadadal Proper gihapon kung asa swerte nga wala ma-intimano ang biktima.
Kahibaluan nga daghan na sa mga sakop sa Dawlah Islamiyah ang napatay sa mga otoridad sa Polomolok nga daghan sa mga nasampit ang nalambigit usab sa ilegal nga droga aron nga masuportahan usab ang ilang operasyon.
