GENERAL SANTOS CITY – Hugot ang pahimangno sa kapulisan nga hinay lang magmaneho og sakyanan aron dili madisgrasya.
Kini human namatay ang usa ka tricycle driver samtang anaa sa kritikal nga kondisyon ang laing tricycle driver human nabangga sa katagbo nga cargo trak sa National Highway, Apopong ning syudad.
Base sa imbestigasyon sa Traffic Management Unit (TMU) naglumba sa national highway ang duha ka tricycle.
Giila ang mga biktima nga si Justin Dica, 18 anyos, nga nakabsan sa kinabuhi, samtang krtitikal ug samaron ang laing driver nga si Navil Jadji Abuban, 23 anyos, residente sa Zone 2, Brgy. Labangal.
Nakatagbo sa duha ka naglumba nga tricycle ang cargo truck nga gimanehuan ni Patrocinio Pagtanan Jr., nga taga Purok Yungco, Brgy. Poblacion, Polomolok, South Cotabato.
Kargado og tahop ang sakyanan nga adunay biyahe padulong sa Tagum, Davao del Norte.
Pagsaysay ni Pagtanan nga paspas kaayo ang duha ka traysikel apan pulos nawad-an ug kontrol hinungdan midasmag atubang sa maneho nga cargo truck.
Parehong gitabang ang mga driver human maipit sa maneho nga tricycle ug gidala sa ospital.
