GENERAL SANTOS CITY – Laing nalambigit sa ilegal nga droga ang namatay sa Polomolok, South Cotabato human misukol sa mga otoridad.
Unang target sa kapulisan ang usa ka high value target nga si Micheal Aritculo nga taga Molo St. Poblacion, Polomolok.
Ang search warrant ang gihimo ngadto sa iyang panimalay kagahapon sa alas 2:00 sa kaadlawon. Gibutyag nga misukol ang target hinungdan nga napusilan sa kapulisan.
Gidala sa ospital ang nasampit apan gideklarang patay sa doktor.
Nakuha gikan kaniya ang 49 ka sachet sa shabu og usa ka caliber 9 mm nga pistola og buhing mga bala.
Makalabay ang pipika ka oras gipahigayon usab ang search warrant operation sa laing high value target nga si Alex Esteves sa iyang balay sa Purok Malabarbas, Poblacion Polomolok.
Apan nakamatikod gilayon ang nasampit sa pwersa sa kapulisan kung asa milukso sa kural sa likod nga bahin sa iyang balay nga malampusong nakaikyas.
Nakuha gikan kaniya ang 11 ka sachet sa shabu nga nakasulod sa kolor violet nga back pack.
