GENERAL SANTOS CITY – Muagi sa barangay ang mga food packs nga tabang sa syudad alang sa mga apektado nga trabahante sa fishport gumikan sa upat ka adlaw nga lockdown.
Kini ang pasalig ni City Administrator Atty Arnel Sapatos nga giandam na ang ihatag nga grocery items human nakiglambigit ang LGU sa mga barangay ug sa tigdumala sa fishport.
Pagbana-bana ni Atty Sapatos nga adunay mukapin u kulang sa kwatro mil ka mga trabahante nga nagtrabaho sa market 1, 2 ug 3 nga nagpuyo sa 26 ka barangay sa syudad ang temporaryo nga nawad-an ug pangita tungod sa gipatuman nga lockdown.
Apan sa data nga gihuptan sa Philippine Fisheries Development Authority (PFDA) adunay mukapin otso mil ka mga tawo ang nahatagan ug bar codes aron makasulod sa maong pasilidad.
Subli nga ablihan ang 32 ektaryas nga fishport complex sa tambler karong adlaw nga lunes.
Ang pagpasirado gipahigayon alang sa decontamination ug massive contact tracing sa mga confirmed coronavirus disease (Covid-19) nga nanukad sa maong pasilidad.
