GENERAL SANTOS CITY – May person of interest na sa pagpusil-patay kang Jenneth Orquillas 33 anyos, negosyante og gikaingong usa ka KAPA collector nga taga Purok Panaggalon, Poblacion Malapatan, Sarangani Province.
Matud pa kang P/Major Jojette Nicolas, labaw sa Malapatan Municipal Police Station nga human sa lubong sa biktima dayong makiglambigit sa bana niini aron berepikahon ang mga pangalan nga migawas nga gikanayong may kalambigitan sa kamatayon sa biktima.
Sa imbestigasyon nga gipahigayon, nasuta nga may bahad na daan ang biktima una pa kini gipusil.
Gipusil ang nasampit sa miaging adlaw udtong totok sa nakamotor nga suspek samtang naa sulod sa iyang cubicle sulod sa iyang panimalay.
Miabut matud pa ang suspek nga nangutana sa presyo sa kopras apan dayon nagmando sa duha ka katabang sa biktima nga muhapa ug dayon gipusil ang biktima gamit ang de silencer nga caliber 45 pistol.
May mga pagduda pa ang mga residente nga ang suspek nakabutang ug dakong kantidad sa salapi ngadto sa biktima nga dili lang may negosyo nga buy and sell apan giila nga tigpadagan sa KAPA ug FOREX sa lugar.
