GENERAL SANTOS CITY – Nasikop ang duha ka trader sa investment scam dinhi sa dakbayan sa GenSan.
Giila ang mga suspek nga silang Marvin Vidal ug Herwill De Lara Catog nga taga Agan North phase 4 sa Barangay San Isidro ning syudad.
Nasayran sa imbestigasyon nga gipanid-an na ang duruha sa mga nabiktima sa mga nasampit ug dayong nagpatawag ug pulis sa dihang nasuta nga anaa sa panimalay.
Matud pa nga ang mag-live-in ang maoy trader sa Unli Shop and Sensilyo Trading ug ubang mga investment scams sama sa Munificence, Shantal, Acts of Charity, NMC ug uban pa kon diin dili muubos sa 100 million ang naka-invest ngadto kanila.
Gani, gibutyag pa sa kapulisan nga si Marvin Vidal matud pa ang maoy midagan sa salapi sa NMC hinungdan nga wala na maka-payout ug kini usab ang nakit-an sa pictures nga nagkatap sa social media nga naghigda sa binandol nga salapi.
Nasuta pa nga sa dihang nahagba ang KAPA Ministry International, nahimong trader ang mga nasampit sa nagkadaiyang investment scams sa Gensan ug Davao.
Muikyas na matud pa unta ang mga nahisgutan padulong sa Cagayan De Oro apan nasikop kaganihang buntag. Sa pagakakaron, daghang complainants ang miadto sa San Isidro Police Station lakip na investors gikan sa Davao City.
Kasong large scale estafa ang atubangon sa mga nasampit nga suspek.
