GENERAL SANTOS CITY – Wala misaler ang kahambog ni American boxer Keith Thurman human mapildi kang Filipino boxing icon og Senator Manny Pacquiao.
Kini ang hugtanong gihingusgan ni Lisa Onding, igsuon sa fighting senator nga nagpabilin sa syudad ug wala mitan-aw og live sa away ni Pacman sa MGM Grand Garden Arena sa Las Vegas.
Nasayran nga adunay gamay nga handa sa balay niini sa Barangay Labangal ning syudad kagahapon human nga mitan-aw ang mga silingan sa away sa igsuon.
Sa interview sa Bombo Radyo GenSan, gibutyag niini nga wala nay kabutangan karon ang kahambog ni Thurman nga kanunay ang patutsada nga patumbahon si Pacman sa ilang away apan wala kini mahitabo.
Sa pahayag ni Onding, wala magkampante bisan nga may natigayong first round knockdown tungod adunay nahibiling 11 rounds pa sa away og daghan pa ang mahitabo.
Giangkon usab niini nga wala niini gilauman nga mapatumba gilayon ni Manny ang kalaban sa round 1 pa lamang sukwahi sa prediksyon sa pipila ka boxing fans nga mahitabo kini sa round 5 o round 10.
Dihang gipangutana kabahin sa gipangayong rematch ni Thurman, gibutyag ni Onding nga dili na gustong makigsangka subli ang Pinoy champ sa US boxer.
Ang pamilyang Pacquiao nagpasalamat sa tanang nag-ampo og misuporta sa away sa fighting senator.
Nagmaya usab ang mga taga GenSan og Sarangani Province sa kadaugan sa Filipino boxer.
Samtang, giandam na sa LGU-GenSan ang ihatag nga heroes welcome sa pag-uli sa senador sa syudad.
