GENERAL SANTOS CITY – “No show” ang KAPA founder nga si Joel Apolinario sa natigayong prayer rally kagahapong adlawa sa ilang mga miyembro dinhi sa siyudad.
Kahibaluan nga nagmartsa sa dalan ang gibanabanaang anaa sa tulo ka libo ka mga miyembro sa naasoy’ng investment scam dayon nagpahigayon ug peace rally sa Oval Plaza.
Dungan niini nagbantay ang kapulisan ug kasundaluhan sa siyudad alang sa paghatag sa seguridad alang sa unsa mang wala gilaumang kasamok atul sa maong lihok-protesta.
Pagkagabii nag-candle-lighting pa ang mga miapil sa rally alang sa pagpadayag sa ilang paghangyo kang Pangulong Rodrigo Duterte nga tugtan nga makapadayon ang operasyon sa KAPA, nga una nang gikondena sa pangulo, ug gitawag nga iligal ang ilang operasyon, matud sa Securities and Exchange Commission (SEC) ug National Bureau of Investigation (NBI).
Atul sa maong panagtigom, nagpadangat lamang ug mensahe si Apolinario sa iyang mga miyembro kung asa gipasalig niini nga magpasang-at ug motion to quash ang iyang mga abogado alang sa gipatuman nga search warrant sa opisina sa KAPA ug sa iyang panimalay, ug gisaway ang mga opisyal sa SEC.
Kahinumduman nga kaniadtong Martes gipasakaan na ug kasong pagsupak sa Securities Regulation Code si Apolinario, misis niini nga si Reyna ug uban pang opisyal sa KAPA.
Samtang gibutyag usab bag-uhay lamang sa Department of Justice nga unsa mang orasa arestuhon na silang Apolinario ug mga opisyal sa KAPA gumikan gikatakda nang magpagawas ug subpoena ang DOJ prosecutors.
Base kini sa gipasang-at sa SEC nga pagsupak sa KAPA officials sa Securities Regulation Code Section 8 o ang pagbawal sa pagbaligya ug pagtanyag ug securities nga walay registration statement gikan sa SEC, apil ang Section 26 sa SRC o ang probisyon kalabot sa fraudulent transactions.
