GENERAL SANTOS CITY – Balhug sa Polomolok Municipal Police Station ang usa ka 68-anyos nga purok chairman human sa natigayong buy-bust operation kagabii.
Giila ang dinakpan nga si Danilo Gumban, residente sa Prk Sto Niño, Cannery Site, Polomolok, South Cotabato.
Kini human matud pa nga positibong napalitan ang suspek ug usa ka sachet sa shabu sa kantidad nga P500 sa gawas mismo sa iyang panimalay.
Nasayran nga gipahigayon ang operasyon human nga nahimo na matud pang hisgutanan sa iyang mga silingan ang iligal nga gimbuhaton sa suspek, kung asa base sa impormasyon, sagad sa iyang mga gibaligyaan mao ang mga batan-on sa ilang lugar.
Samtang, nasuta nga miaging adlaw lamang napasakaan usab si Gumban ug kasong statutory rape. Kini human napamatud-an matud pa nga iyang nalugusan ang usa ka 12-anyos nga biktima.
Nasayran nga ang maong biktima kanunay matud pang gapangayu-ngayo sa suspek ug salapi.
Samtang nasayran usab nga kanhi na usab nga may laing kasong pagpanglugos ang naasoy’ng purok chairman.
Giandam na ang kasong paglapas sa RA 9165 kon Comprehensive Dangerous Drugs Act of 2002 nga ipasang-at batok sa dinakpan.
