GENERAL SANTOS CITY – Nakumpiska ang granada, mga nagkadaiyang matang sa pusil, mga bala ug ubay ubay nga indian piana sa pag-implementa sa kapulisan sa search warrant sa Lanton 14, Sultan Pendatun, Brgy. Apopong ning syudad, Lunes sa buntag.
Gilusad sa hiniusang pwersa sa mga sakop sa Makar Station og City Mobile Force Company sa General Santos City Police Office ang operasyon batok sa target nga panimalay nga gipanag-iyahan sa nagpangalan ug Samson Fuyonan Cenas, 49, minyo nga residente sa lugar.
Dihang namatikdan sa mga residente nga nagpaduol ang mga pulis, nagkatibulag ug nanagan ang mga nasampit.
Paspas nga gipadagan ni Cenas ang multicab samtang ang uban ang nagsakay ug motorsiklo nga gituohang mga armado og paspas nga mipalayo sa lugar hinungdan nga gigukod sa operatiba nga nagresulta sa pagbayluanay ug buto sa pusil.
Samtang nagginukdanay, namatikdan sa mga pulis nga may gilabay ang driver sa multicab ug sa ulahi, malampusong nakorner sa kapulisan ang multicab ug ang driver.
Dihang giberipika sa otoridad kung unsa ang gilabay sa driver, narekober ang usa ka sling bag nga may usa ka caliber 45 pistol nga may magazine ug karaga nga pito ka buhing bala sa maong pusil, 10 ka indian pana, 2 ka sling shot oug cellphone.
Kahibaluan nga wala ang subject sa search warrant nga si Conrado Doydoy Cenas apan nadakpan sa kapulisan si Samson Cenas, nga sa pagsuta maoy tag-iya sa balay.
Narekober pa sa posisyon sa nasampit ang 4 ka buhing bala sa caliber 45 pistol, usa ka unit sa fragmentation grenade M26, duha ka sling shots ug usa ka Indian pana.
Gipailawom sa inventory ang tanang ebidensyang nakuha nga gisaksihan sa representante gikan sa media og Brgy Kagawad sa Apopong.
Sa pagkakaron balhog sa Makar Police Station si Samson Cenas nga gilaumang ipresenta sa piskalya ning adlawa alang sa pagpasaka ug kaso.
