GENERAL SANTOS CITY – May person of interest na ang mga imbestigador sa Lagao Police Station kalabot sa posibleng responsable sa pagpatay sa bodegero nga nakaplagan sa imburnal sa ginapatukod nga commercial building sa Fernandez Street, Brgy. Lagao ning siyudad kagahapon sa buntag.
Kahibaluan nga ang biktima giilang si Reymart Pregoner, 26-anyos, residente sa Purok Tampuan Brgy Tinoto, Maasim, Sarangani.
Kahibaluan nga ang nasampit mao usab ang time keeper sa mga trabahante sa construction sa nasampit nga commercial building.
Kahibaluan nga nakapalagan ang biktima sa iyang mga kaubanan niyang trabahante nga igo lamang gisugo nga magbutang ug tubo sa imburnal.
Aduna kini samad-tinigbasan sa nawong. Matud usab sa Foreman, ulahi niyang nakaistorya ang biktima sa telepono miaging gabii kalabot sa nadaot nga suga sa gambalay.
Natingala na lamang matud pa siya dihang wala na nila nakitan ang biktima pagkabuntag.
Sweldo usab matud pa nila miaging adlaw hinungdan nga nananghid ang biktima muuli unta sa iyang pamilya sa Maasim kagahapong adlawa.
Robbery ang ginatan-aw nga motibo sa mga otoridad kalabot sa maong krimen, gumikan nawala matud pa ang sweldo sa biktima nga P9,000 gikan sa bag niini nga narekober usab sa imburnal.
Ginapangita na usab ang ulahing nakauban sa biktima, nga sa karon dili na matud pa ma-contact.
