GENERAL SANTOS CITY – Malaumon ang SOCCSKSARGEN Warriors nga mas daghang gold medals pa ang maangkon sa Region 12 alang sa Palarong Pambansa ning tuiga itandi kaniadtong 2018.
Matud pa ni Jojo Duhilag, Physical Education Sports Supervisor( PESS) sa Deped 12 nga kagahapong adlawa milarga ang delegasyon padulong sa Davao City.
Una milarga, nagpahigayon ug misa ang delegasyon alang sa malampuson ug luwas nga Palarong Pambansa.
Sumala pa nga gumikan sa mga inisyatibo nga gihimo ni Deped 12 Regional Director Allan Farnaso, mas maningkamot ang mga atleta nga maka-gold medal.
Ang gold medalist ang makaangkon og tag P20,000 gawas pa nga nagkuha pa og trainers gikan sa kauluhan.
Sa pamahayag ni Duhilag nga dili usab magpaulahi ang Region 12 sa mga individual events sama sa arnis, taekwondo swimming ug billards.
Nasayran nga sa miaging tuig nga Palarong Pambansa nga natigayon sa Ilocos Sur, anaa sa ikapito nga pwesto ang SOCCSKSARGEN nga may 21 gold medals, 26 silver og 32 bronze.
Ipahigayon ang Palarong Pambansa 2019 sa Davao City nga magsugod sa Abril 27 hangtod sa Mayo 4, 2019.
