GENERAL SANTOS CITY – Bisag dugay pa mahuman ang Overseas Absentee voting alayon sa May 2019 Midterm elections, miboto na ang mga overseas Filipino worker (OFW) sa Hong Kong.
Sa pakighinabi sa Bombo Radyo GenSan kang Analyn Jopanda, taga-North Cotabato apan gatrabaho sa HongKong, midalikyat matud pa siya sa pagboto bisag may trabaho ning higayuna.
Kini gumikan kon Lunes hangtod Biyernes gamay lang ang gaboto sukwahi kon adlaw’ng Sabado ug Dominggo.
Gikadugang pa niini nga kon weekends, halos mag-usa ka oras mag-antos sa pagpila una makaboto tungod ubay-ubay sa mga OFW ang day-off sa maong higayon.
Nasayran matud pa niya ang pangalan sa mga magpapili sa national posts pinaagi sa pagtan-aw ug balita sa internet ug social media.
Kahibaluan nga kauban niya ang igsuon dihang miboto ning adlawa.
Giawhag usab niini ang uban pang OFW sa Hong Kong nga dili palagpason ang kahigayunan nga magboto sa eleksyon.
Nasayran nga wala gayud gasipyat si Jopanda sa pagboto matag eleksyon isip absentee voter sukad nga nagtrabaho sa HongKong.
