GENERAL SANTOS CITY – Magsugod karong adlawa ang Summer Youth Festival 2019 dinhi sa dakbayan.
Kahibaluan nga hugot ang nahimong pagpangandam sa lokal nga panggamhanan ning siyudad alang sa labing dakong summer youth festival sa tibuok nasud, nga matag tuig ginapahigayon sa siyudad sa pagpanguna sa Youth Affairs and Development Office (YADO).
Kini na ang ikalima ka tuig sa pagpahigayon sa siyudad sa dul-an duha ka bulan nga aktibidad alang sa mga kabatan-uanan, nga mulungtad hangtod Mayo 31.
May ipahigayon nga Parada ng Kabataan nga kabahin sa opening ceremony.
Magsugod ang parada alas-3:00 sa hapon, atubangan sa SM City sa Santiago Boulevard.
Sa pakighinabi sa Bombo Radyo GenSan kang Judith Janiola sa City Population Management Office, gibutyag sa event manager sa maong aktibidad nga muagi matud pa ang parada sa Magsaysay Avenue, Pioneer Avenue hangtud sa atubangan sa Plaza Heneral Santos kung asa ipahigayon ang opening ceremony ug may cheerdance competition usab nga ipahigayon.
Giawhag ni Janiola ang mga partisipante mga magsul-ob ug festive attire sama sa neon o pang-circus nga maoy tema ning tuiga.
May giandam usab nga premyo, kung asa P20,000 ang 1st prize, P15,000 sa 2nd prize, ug P10,000 ang 3rd prize.
