GENERAL SANTOS CITY – Padayong ginaimbestigahan sa Police Regional Office 12 ang nasikop nga usa ka suspected member sa usa ka Islamic State-inspired local terrorist group Miyerkules sa gabii, Disyembre 19.
Giila ni Chief Supt. Eliseo Tam Rasco, regional director sa PRO-12, ang dinakpan nga si Jamio Sala alias Jamiung ug Jum Jum nga nasikop sa gipagayong operasyon sa hiniusang pwersa sa mga otoridad sa alas-7:30 sa gabii sa Osmena Street, Brgy Dadiangas East ning siyudad.
Giaresto matud pa ang suspek pinasubay sa Martial Law Arrest Order No. 2, kung asa narekober sa posisyon niini ang usa ka fragmentation grenade, ug suod matud pa kang commander Salahudin Hassan sa Bangsamoro Islamic Freedom Fighters (BIFF).
Kahibaluan nga si Hassan ang usa sa BIFF leaders nga responsable sa natigayong duha ka pagbusikad sa Isulan, Sultan Kudarat kanaidtong Agosto ug Setyembre, nga gikamatay sa lima ka tawo, ug kapin 40 ang angol.
Sa impormasyon, gitahasan matud pa si Sala nga magpahigayon ug mga pagpamomba dinhi sa siyudad atul sa kapaskuhan.
Nasayran usab base sa report sa RIU-12 nga si Sala ang kanhing miyembro usab sa Ansar Al-Kihilafa Philippines (AKP) terror group nga nalambigit sa pipila ka mga terror attacks sa rehiyon sukad kaniadtong 2008.
Ug gani, usa matud pa si Sala sa AKP members nga nalambigit sa uban pang mga pagpangatake sa nagkalain-laing rehiyon.
