GENERAL SANTOS CITY – Gikatakdang muuli sa siyudad ning adlawa ang team ni WBA welterweight champion ug Sen. Manny Pacquiao.
Kini aron dinhi sa siyudad ipadayon ang ikaduhang hugna sa iyang training camp alang sa away kang Adrien Broner sa Enero 19 nga ipahigayon sa MGM Grand Arena sa Las Vegas.
Kahinumduman nga wala gisipot ni Pacquiao si Coach Buboy Fernandez sa training unta nila kaniadtong Martes sa Elorde Boxing Gym sa Mall of Asia sa Pasay City, kung asa subli unta niyang maka-sparring si Australian boxer George Kambosos Jr.
Matud kang Fernandez, gikapoy ang fighting senator sa trabaho sa Senado.
Kahibaluan nga usa si Pacquiao sa 235 nga magbabalaod nga miboto ug Yes sa gipahigayon nga joint session sa Kongreso kagahapong adlawa alang sa subling paglugway sa Martial Law sa Mindanao ug dugang usa ka tuig, ug suspensyon sa privilege of the writ of heabeas corpus.
Samtang sa Disyembre 17 magsaulog si Pacman sa iyang 40th birthday dinhi sa siyudad, kung asa gilauman nga mutambong ang pipila ka mga dagkong personalidad sa pulitika ug showbiz.
