GENERAL SANTOS CITY – Gikalipay sa mga kabanay sa mga biktima sa Maguindanao massacre ang balita nga matud pa sa unang quarter sa 2019 na posibleng ipagawas ang desisyon sa mga gitudlong suspek sa Maguindanao massacre nga nahitabo kaniadtong November 23, 2009.
Sa eksklusibong pakighinabi sa Bombo Radyo kay Monette Salaysay, asawa sa namatay nga mamahayag nga si Napoleon “Nap” Salaysay, ang kanhi manager sa DZRO, gibutyag niini nga mas mahimong malipayon sila kung magpagawas na og desisyon ang korte sunod nga tuig kalabot sa kaso.
Dismayado kini sa hilabihan kalangan nga dagan sa kaso nga miabot pa og siyam ka tuig apan hangtud karon wala pay nakombikto luyo sa gipresenta nga ebidensiya batok sa mga prime suspects.
Sa mga pagdungog nga iyang natambungan sa Kauluhan halos tanang mga testigo, Si Datu Unsay Mayor Andal Ampatuan Jr. ang gitudlo nilang mastermind sa masaker.
Gikalain pa sa ilang buot nga gitugutan si ARMM Gov. Zaldy Ampatuan sa Quezon City RTC nga makagawas sa bilangguan og mitambong sa kasal sa iyang anak apan human ang tulo ka oras subling gibalik sa bilangguan. Nagpakita lang kini nga dili patas ang balaud alang sa tanan.
Gihingusgan ni Salaysay nga imbes nga kini ang unahon angayang mas tutukan unta sa korte ang kaso.
Gihingusgan ni Salaysay nga kung tinuod nga adunay hustisya dinhi sa nasud, makombikto gayud ang mga Ampatuan.
Tingog ni Monette Salaysay, asawa sa namatay nga mamahayag nga si Napoleon Salaysay,
