GENERAL SANTOS CITY – Dili muatras ang lokal nga panggamhanan sa GenSan luyo sa bahad sa seguridad og desididong ipadayon ang selebrasyon sa 20th Tuna Festival.
Matud pa ni Vice Mayor Shirlyn Bañas-Nograles nga nasubo kini sa natigayong pagpamomba sa Isulan Sultan Kudarat.
Gikondena ang insidente tungod sa daghang inosente ang naangin. Sa iyang pahayag, apektado ang paglambo sa Isulan sa nahitabo sa ilang lugar tungod magduhaduha ang mga mububo og negosyo.
Sumala pa sa bise mayor, ang panghitabo sa Isulan, magsilbing hagit sa syudad nga mas pahugtan ang security measures ilabina nga nagkaduol ang selebrasyon sa Tuna Fest.
Gibutyag ni Nograles nga luyo nga andam na ang tanan apan angayan gihapong masiguro nga mahimong hapsay og magmalampuson nga isaulog ang kapiyestahan.
Ug kini makab-ot pinaagi sa pagtinabangay sa tanan nga mabantayan ang seguridad.
Kahibaluan nga kapin 1,000 pulis ang gideploy sa usa ka semana nga selebrasyon sa Tuna Fest.
Kahibaluan nga sa Setyembre 5, ang culmination day sa Tuna Festival, ang gideklara nga sepcial non-working holiday sa siyudad.
Matigayon usab sa maong adlaw ang usa sa highlights sa selebrasyon, ang Bombo Bancarera: Tuna Festival Edition Mindanao Circuit Championship Leg.
Dinhi mag-atbang ang mga labing maayo nga banca riders sa Mindanao, nga midaog sa Bombo Bancarera 2018 Mindanao circuit leg, nga una nang gipahigayon sa Sarangani, Butuan, Davao, ug Cagayan de Oro.
