GENERAL SANTOS CITY – Giklaro ni Coach Buboy Fernandez ang hinungdan sa iyang paghilak og pagluhod sa ibabaw sa ring human ang kadaugan ni Sen. Manny Pacquiao.
Sa exclusive interview sa Bombo Radyo GenSan, gibutyag ni Coach Buboy nga ang pagtulo sa iyang luha dili lang tungod nga malipayon siya sa kalampusan sa senador nga tulo ka higayong gipatumba si Lucas Matthysse kun dili adunay mas lalom pa nga hinungdan.
Sa iyang pamahayag, sa pagsaka niya sa ibabaw sa ring, gipukpok pa niini ang hagdanan og nag-ampo sa Ginoo nga dili pasagdan ang suod nga higala nga si Manny nga dako matud pa iyang utang kabubut-on.
Samtang, dako usab ang pasalamat ni Coach Buboy ngadto sa pamilya Pacquiao ilabi na kang Jinkee Pacquiao og kay Mommy Dionesia, inahan sa Peoples champ nga gisalig kaniya nga pangunahan ang training.
Gibutyag niini nga una kini misaka sa ibabaw sa ring, gigakos og giampuan siya ni Mommy D ug gisultihan nga dili pasagdan si Manny.
Samtang, nalipay matud si Coach Buboy nga gisunod tanan sa Peoples Champ ang mga tambag niini atul mismo sa engkwentro kay Matthysse.
Sa dihang anaa pa sila sa dressing room, gipasidan-an niya si Pacquiao nga likayang maratol og dili kalimtan ang depensa samtang sa 1st round gi-istodyohan pa ang dula aron sa 2nd round maka-diskarte dayon.
Sa Round 2 , gipasulayan niini kay Manny nga atakehon ang kalaban og dayong naobserbahan nga mataranta si Matthysse og dili makabalo makigsugat-sugat og muabante. Sa maong higayon, nasabotan dayon nila ni Asst. coach Nonoy Neri nga sudlon og atake sa Round 3 kung asa napaluhod ang Argentine boxer.
Apan luyo niini, wala sila magkumpiyansa tungod basin ‘patibong’ lang kini sa kampo ni Matthysse aron hatagan ug kumpiyansa si Pacman aron musige na lang o atake og kon makakuha og tiyansa, paulanan gilayon ug kinumo.
Apan sa dihang nakit-an nila nga sa Round 6, nalipong na gyud si Matthysse, didto na nagdesisyon sila nga paulanan na og jab straight, right hook hinungdan nga subling natumba ang kalaban pag-abot sa Round 7.
Gikanayon ni Coach Buboy nga malipayon siya sa resulta sa away tungod nibalik na matud pa ang kalagsik og kusog sa kinumo sa Pinoy ring icon nga dugay ng gihandom nga makit-an sa tanan.
samtang, mapasalamaton si Fernandez nga nagnegatibo sa Angiogram procedure og treadmill test si SenatorPacquiao human nga gipailawom sa pagsuta sa doktor.
Matud pa niini, Dominggo sa gabii niadtong Hulyo 8, gipahibalo siya ni Manny adunay nagbara nga ugat sa kasingkasing human gipailawom sa electrocardiogram kon ECG.
Isip usa sa gisaligan, maong giutong niya ang kabalaka niini human gihangyo nga ihilom ang nahitabo.
Sa maong higayon, misangpit siya sa Ginoo nga dili hatagan og problema ang suod nga higala og magnegatibo ang resulta tungod daghan kaayong tawo ang gasalig kay Pacman.
Dihang, gipahibalo kaniya ni Manny nga walay problema, dako ang pasalamat niini sa Ginoo.
Sa iyang pahayag, gifted nga tawo ang senator kung asa kung tan-awon, luyo sa kataas sa panahon sa pagpamoksing wala gitakbuyan ug sakit og active kaayo.
Sumala pa ni Buboy nga pinalangga gayud sa Ginoo si Manny nga usa ka tawong maluluy-on.
Kahibaluan nga nakahilak ang mga miyembro sa team Pacquiao human ang rebelasyon ni Pacman nga mipailawom sa Angiogram procedure ug nahimo kini nga i-sekrito sa ilaha aron dili mabalaka.
Sa pahayag ni Pacquiao, kung nagpositibu nga adunay ugat nga nagbara dili na siya pagawason sa ospital kay diretso na kining operahan ug dili unta mahinayon ang ilang away ni Lucas Mathysse.
